کۆماری ئیسلامی؛ ڕوخسارێک پڕ لە گەندەڵی و سەرکوت
ڕێژیمی کۆماری ئیسلامی ئێران بە دەستی خۆی وڵاتی کردووە بە وێرانەیەک پڕ لە گەندەڵی و نادادپەروەری و سەرکوت. ئەم ڕژیمە نەک هەر ئازادییە تاکەکەسییەکان و کۆمەڵایەتییەکانی سەرکوت کردووە، بەڵکوو بە پێشێلکردنی سیستماتیکیی مافەکانی مرۆڤ، کوشتن و لەسێدارەدانی هەزاران کەس و دڕندەیی بەرانبەر بە خەڵک، ڕوخسارێکی تاریک و ترسناکی لە ئێران خستووەتە ڕوو.
لە منداڵەوە بۆ بەساڵاچوو، لە ژنەوە بۆ پیاو، کەس لەم دەسەڵاتەدا پارێزراو نییە. سیاسەتی هەڵەی ئابووری، گەندەڵیی بەربڵاو و تاڵانکردنی سامانی نەتەوەیی، گەلی ئێرانی بەرەو هەژاری و نەهامەتی بردووە. لە کاتێکدا ملیۆنان ئێرانی بەهۆی برسێتی و بێکاری و قەیرانی ژیانی ڕۆژانە دەناڵێنن، بەرپرسانی ڕێژیم سەرقاڵی شتە بەنرخەکان و کۆکردنەوەی سامانن لە کۆشکە ڕازاوەکانی دەرەوەی ئێران.
لە کوردستان، ئەهواز، سیستان و بەلووچستان و ناوچەکانی دیکە، سیاسەتی سەرکوتگەرانە و نەتەوەییی ڕژیم ڕەنگدانەوەی سروشتی تاکڕەوانە و ڕەگەزپەرستانەیە. بەتایبەت لە کوردستان بە دڕندانەترین شێوە هێرش کراوەتە سەر خەڵک و لایەنگرانی حیزبی دێموکرات. کوشتنی بەئامانج، بۆردومانکردنی ناوچەکانی نیشتەجێبوون و سنووردارکردنی خوێندن و کولتووری کوردی، تەنیا بەشێک لە توندوتیژییەکانی ئەم دەسەڵاتەن.
بزووتنەوە جەماوەرییەکان و ناڕەزایەتییەکانی سەر شەقامەکان و خۆڕاگریی ژنان و لاوان هەمیشە نیشانیان داوە کە دەسەڵات، بێدەسەڵات و لاوازە. شەهیدبوونی ژینا ئەمینی و توندوتیژیی هێزە ئەمنییەکان و زیندانە پڕ لە چالاکانی سیاسی و سنووردارکردنی توندی میدیاکان هەموویان بەڵگەن لەسەر شکستی ئەخلاقی و ئینسانی ڕێژیم.
ڕێژیمی کۆماری ئیسلامی تەنیا دوژمنی گەلی ئێران نییە، بەڵکوو هەڕەشەیە بۆ سەر تەواوی ناوچەکە و ئاسایشی جیهانی. بەرنامە ئەتۆمییەکانی، پشتیوانی لە تیرۆر، دەستتێوەردان لە وڵاتانی دراوسێ و سەرکوتکردنی هەر دەنگێکی ناکۆک، ئێرانی کردووە بە ئەکتەرێکی تێکدەر و مەترسیدار.
بەڵام ڕاستییەکە ئەوەیە: هیچ ستەم و ستەمکارییەک ناتوانێت بۆ هەمیشە بەردەوام بمێنێت. خەڵکی ئێران، لە کوردستانەوە تا تاران، لە ئەهوازەوە تا بەلووچستان، بە خۆڕاگری، داهێنان و بوێری، نیشانیان داوە کە خواستی ئازادی و دادپەروەری هێزێکی لە دەرەوەی ترس و سەرکوت هەیە. ڕێژیمی کۆماری ئیسلامی بە هەموو دەسەڵات و توندوتیژیی خۆیەوە، بەرانبەر بە ئیرادەی گەل بێدەسەڵاتە.
داهاتووی ئێران، ئێرانێکی ئازاد و دێموکراتیکە. ئێرانێک کە هیچ ژن و پیاوێک بەهۆی ڕەگەز و باوەڕ و نەتەوەییی خۆیەوە هەڕەشەی لێ ناکرێت، ئێرانێک کە ئازادیی ڕادەربڕین و دادپەروەری و مافی مرۆڤ تێیدا زاڵ بێت، ئێرانێک کە گەندەڵی و ستەمکاری تێیدا بنبڕ بکرێت. ڕێژیمی ئاخوندی کە خۆی بە نەڕووخاو دەبینێت، لە داهاتوویەکی نزیک بە خۆڕاگریی خەڵک و پشتیوانیی کۆمەڵگەی نێودەوڵەتی، دەخرێتە زبڵدانی مێژوو.
ئێرانێکی ئازاد نزیکە؛ ڕژیمی کۆماری ئیسلامی لە لێواری لەناوچووندایە؛ و دەنگی گەلی ئێران هەرگیز بێدەنگ ناکرێت.
ئیدریس هاشمی – سوید
2025 – 06 – 25