ئازار 23, 2023 Diyako Hashemi
هۆنراوەی جوان
نووسین: دیاکۆ هاشمی
پێناسەی شیعر کارێکی زۆر ئەستەمە و لە درێژاییی مێژوودا شارەزایان بە شێوەی جۆربەجۆر هەوڵیان داوە خۆیان لە مەبەستەکە نزیک بکەنەوە و خۆشیان لەوە ڕازی نەبوون. وەک ئەوەیە بە تۆ بڵێن پێناسەی جوانی و ناسکی و دڵڕاکێشان بکە. چ خەیاڵێک دەتوانێت بە شێوەیەکی ڕەبەق ئەو چەمکانە ڕاڤە بکات؟
بەگشتی دەتوانین بڵێین شیعر دەربڕینێکی دڵبزوێنە کە سۆز، جوانی، هەست و هزری تێدا بێت، بە بڕوای زۆر کەسیش دەبێت سەروای تێدا بێت و بە بنەمای بنەڕەتیی هۆنراوەی دەزانن. هەروەها دەبێت یاسا و ڕێساکانی هۆنراوەزانیی تێدا ڕەچاو کرابێت و بۆ جوانترکردنی هەوڵ بدرێت بە زانستی بەدیع و جوانکاری بڕازێنرێتەوە.
نموونەی شیعری جوان:
خەتات فەرموو کە خۆشە چین و ماچین
کە ناچین، لێرە خۆشەچینی ماچین
برۆت هەر چین و پەرچەم چین لەسەر چین
ئەمەندە چینە، قوربان، پێم بڵێ چین؟!
شکافێکە کڵافەی نافی زوڵفت
دەڕێژێ میسک و عەنبەر لێرە تا چین
لەسەر بەرگی گوڵێکی باغی حوسنت
هەزار، گوڵچینی بێبەرگ و نەواچین!
ئەتۆ میهری و مەهڕوویان ستارەن
لە خزمەت شەوقی تۆدا شەوچرا چین؟!
هەموو زەڕڕاتی میهری ڕووتە با قین
خودامان بۆ بەقایە لێرە لاچین!
بڵێ نالی بە ئەربابی وەفا: بێن
هەموو موحتاجی خاک و بێڵ و پاچین
نالی